ភ្នំពេញ៖ រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា លោក ឯម ច័ន្ទមករា ច្រានចោលចំពោះគណនីតេឡេក្រាមក្លែងក្លាយដែលកំពុងប្រើប្រាស់ឈ្មោះ និងរូបភាពរបស់លោកដាក់ឈ្មោះថា «CS.Makara Chan Em» និងស្នើសាធារណជនកុំចាប់អារម្មណ៍ ឬឆ្លើយតបទៅនឹងសារនៃលេខតេទ្បេក្រាមក្លែងបន្លំនោះ។

តាមរយៈសារលើបណ្តាញសង្គមផ្ទាល់ខ្លួន លោក ឯម ច័ន្ទមករា នាថ្ងៃទី៥ ខែធ្នូ ឆ្នាំ២០២៣ បានឱ្យដឹងថា៖ «ខ្ញុំសូមជម្រាបជូនពុកម៉ែបងប្អូន មិត្តភក្តិ និងអ្នកទាំងអស់គ្នាថាថ្មីៗនេះ មានជនអនាមិកបានក្លែងបន្លំបង្កើតលេខតេឡេក្រាម (Telegram) ដោយប្រើប្រាស់ឈ្មោះរបស់ខ្ញុំ ឯម ច័ន្ទមករា (Em Chan Makara) ដោយជនខិលខូចបានបង្កើតតេឡេក្រាមក្លែងក្លាយ (fake account) ដាក់ឈ្មោះថា “CS.Makara Chan Em“»។

លោក ឯម ច័ន្ទមករា គូសបញ្ជាក់ថា ប្រសិនបើទទួលបានសារ ដែលអះអាងថាជាលោក សូមកុំយកចិត្តទុកដាក់ និងប្រុងប្រយ័ត្ន ចំពោះការឆបោកដែលកំពុងកើតមាន ដោយការប្រើឈ្មោះ និងរូបថតរបស់លោកទៅប្រើប្រាស់។

លោក ឯម ច័ន្ទមករា បដិសេដដាច់ខាត និងអំពាវនាវដល់អាជ្ញាធរមានសមត្ថកិច្ចមេត្តាផ្តន្ទាទោសជនឆបោកនេះតាមច្បាប់ជាធរមាន។

គួរឱ្យដឹងផងដែរថាលោករដ្ឋលេខាធិការ ឯម ច័ន្ទមករា មាន Channel Telegram ផ្លូវការតែមួយគត់ដែលមានឈ្មោះថា ឯម ច័ន្ទមករា - EM Chan Makara នឹងមានសញ្ញាធីក ទទួលស្គាល់ពី Telegram៕